ESCOLAS

Cidade vs Rural. Unha dicotomía que agora se nos presenta e sobre a que queremos cavilar. Pode o rural ser futuro? É o rural unha boa opción? Que é o rural?

Xatería deriva de "xata", cría das vacas, son as que realmente habitan o rural galego, reavívano. Se nós, como especie humana, queremos retornar a esa vida, debemos de facelo como elas. Somos vacas, somos xatas e, como tales, debemos formarnos na Xatería. Así, este termo imaxinado xorde como grande metáfora do termo "escola". A Xatería é ese espazo onde medrar, onde mostrarnos, onde voltar. A Xatería é onde as xatas poden amosar a súa metamorfose cara as grandes artistas vacunas que todas son.

A través desta exposición reunimos a artistas e pezas que mostran diferentes perspectivas do rural. Achegas que veñen dende o sentimental, o íntimo, a crítica ou enxalzamento; que amosan o vínculo ou a falta deste; que fan reflexionar arredor del; que falan de calquera aspecto que poida englobar o termo rural. Unha exposición colectiva que a través de diferentes disciplinas conecta as visións de artistas de todo o mundo, máis de 15 artistas. Así, Adrián Salgueira, Ana Sánchez, Antón Zaera, Cinema Semente, Cristina Chiarroni e Rokekes, Daniel Emmanuel Iglesias, Daniel Selas, Elvira Martos, Inma Veiga, Laura MS, Lil Chachi, Nora Galván, Santiago Barandiaran, Seares e Telarete son a escolma de artistas que compoñen esta Xatería.