Retomamos este termo valdelomariano, “aprojimar” (fusión dos termos casteláns “aproximar” e “prójimo”) para falar, nesta conferencia, da difusión da obra de Val del Omar dentro e fóra das nosas fronteiras. Nesta sesión desenvolveremos os temas introducidos nos programas que lle dedicamos este ano (El cine como elemento e o especial de Camera obscura dedicado ao seu laboratorio PLAT) a través das valiosas contribucións dunha serie de expertos que nos abrirán unha porta á fascinante galaxia Val del Omar.
Interveñen:
Gonzalo Sáenz de Buruaga
Colaborador e cómplice en vida de José Val del Omar, e fundador coa filla do granadino do Archivo María José Val del Omar y Gonzalo Sáenz de Buruaga, é unha figura imprescindible na preservación e difusión da vida e obra de Val del Omar.
Piluca Baquero
Directora do Archivo Val del Omar, dende hai máis de dúas décadas combina o seu labor como produtora de cine e como actual directora do Grao en Cine e Ficción Audiovisual UCJC coa xestión e o coidado da obra de José Val del Omar.
Víctor Berlín
Montador, programador, docente e xestor cultural, Berlín leva dende 2007 estudando en profundidade a vida e obra do cinemista granadino. En 2013 funda xunto a Beatriz Navas o arquivo fílmico en liña PLAT.TV, nomeado así en honor de Val del Omar.
Modera: Elena Duque
