CIP | A internet de mudar as cousas

O Carballo Interplay quere poñer o foco nesta ocasión sobre contidos sociais e políticos, sobre o cuestionamento propio, sobre a utilidade de internet como ferramenta para a reivindicación e como arma para axudar a mellorar o mundo (algo no que aínda confiamos). Por isto dedicaremos a mañá do sábado a escoitar a persoas que cremos utilizan as posibilidades do online para amosar outras realidades ou facer da rede un lugar mellor ben sexa dende a exposición e desglose de información, contido político ou editorial, a creación de redes de sororidade, a ilustración ou o humor.

Panel 1 | Activismo na rede: Proyecto UNA, Laura Tabarés e Cuellilargo

Internet, onde calquera pode participar, é tamén un lugar para os comportamentos tóxicos, que sempre existiron pero que agora contan con algoritmos que multiplican o seu alcance entre unha sociedade debilitada e fácil de alporizar. A rede hai tempo que deixou de ser un espazo de utopías para albergar algunhas distopías con graves consecuencias no ‘mundo real’. Nun espazo gobernado polos clics, os likes e a sobreexposición continua, hai espazo para os discursos disidentes? Como se combaten os discursos de odio? Cales son as claves para xerar espazos de seguridade?

Panel 2 | Humor, precariedade xeracional e ilustración: Monstruo Espagueti, La Prados e Roberta Vázquez

Mentres o mundo trata de superar unha pandemia global e as súas consecuencias, a esfera dixital medrou tanto que ocupa o centro de boa parte da nosa vida, dende as relacións sociais ata a cultura ou o entretemento: un 360º. Na rede, unha xeración maioritariamente feminina inunda os nosos dispositivos coas súas ilustracións poñendo o foco sobre a precariedade xeracional ou as condicións laborais e retratando o noso mundo con perspectiva de clase e de xénero, Son sarcásticas, divertidas e co seu humor fan que todas levemos mellor “lo que se viene”. Porque tamén se reivindica dende a comedia. 

RESERVA PREVIA DE ENTRADAS GRATUÍTAS

Para acudir ás sesións será preciso realizar reserva previa de entrada, de xeito gratuíto, cun máximo de dúas por persoa.

 As entradas serán nominais, para garantir un rexistro de público que permita realizar a trazabilidade en caso de ser necesario. Os datos de contacto recollidos son para garantir a seguridade e serán utilizados única e exclusivamente con este obxectivo. Este arquivo custodiarase por un período non inferior a tres meses nin superior a nove meses.

 As entradas NON validadas 15 minutos antes do inicio da sesión poderán reasignarse a outra persoa.

 PROTOCOLO COVID19

 Establécese un protocolo COVID-19 que se debe seguir en cada espazo: desinfección de mans con xel hidroalcohólico no acceso, uso obrigatorio de máscara en todo momento (salvo presentación de xustificante que acredite estar exento de facelo), respecto do percorrido de entrada e de saída e uso da cadeira asignada, sen cambiar o seu emprazamento.

 Ao final do espectáculo, deberase prestar atención ás indicacións do equipo para evacuar o recinto de forma organizada, escalonada e controlada. Os espazos baléiranse completamente de público para proceder á hixenización do mobiliario entre as montaxes.

O evento tamén poderá seguirse en streaming nas canles de Youtube, Facebook e Twitch do Carballo Interplay.